Молитвы святому апостолу Петру

Тропарь святому апостолу Петру
глас 4

Рима не оставль, к нам пришел еси,/ честными веригами, яже носил еси, апостолов первопрестольне./ Имже верою покланяющеся, молимся:/ твоими к Богу молитвами// даруй нам велию милость.

Тропарь первоверховным апостолам Петру и Павлу
глас 4

Апостолов первопрестольницы,/ и вселенныя учителие,/ Владыку всех молите/ мир вселенней даровати// и душам нашим велию милость.

Тропарь апостолов
глас 4

Апостолов первопрестольницы/ и вселенныя учителие,/ Владыку всех молите/ мир вселенней даровати// и душам нашим велию милость.

Кондак святому апостолу Петру
глас 2

Верховнаго и перваго апостолов,/ истины Божественнаго ученика,/ Петра великаго восхвалим,/ и того верою целуем вериги,// прегрешений разрешение приемлюще.

Кондак первоверховным апостолам Петру и Павлу
глас 2

Твердыя и боговещанныя проповедатели,/ верх апостолов Твоих, Господи,/ приял еси в наслаждение благих Твоих и покой:/ болезни бо онех и смерть приял еси паче всякаго всеплодия,// Едине, сведый сердечная.

Кондак апостолам
глас 2

Твердыя и боговещанныя проповедатели,/ верх апостолов Твоих, Господи,/ приял еси в наслаждение благих Твоих и покой:/ болезни бо онех и смерть приял еси паче всякаго всеплодия,// Едине, сведый сердечная.

Величание первоверховным апостолам Петру и Павлу
Величаем вас,/ апостоли Христовы Петре и Павле,/ весь мир ученьми своими просветившия// и вся концы ко Христу приведшия.

Молитва святому апостолу Петру
О, святый Петре, великий апостоле, самовидче и сотаинниче Божий, всемощною десницею Учителя твоего приятый из вод волнующихся и крайняго потопления свобождшийся! Не забуди и нас убогих, в тине греховней погрязших и волнами житейскаго моря обуреваемых: подаждь нам твою руку крепкую, помози нам и удержи нас от потопления во страстех, похотех, лжах и клеветах. Сотвори и ты с нами милость, тебе от Господа явленную, да не в сомнении и маловерии изгибнем. Научи нас, учителю наш, проливати слезы покаяния, да плачем горько о деяниих наших в веце сем. И аще твоя слезы, в покаяние излиянныя, милостию Своею покры Господь и Учитель твой, испроси и нам, со дерзновением апостольским, прощения во гресе ежечаснаго. Град сей, ко святым стопам твоим поверженный, сохрани и от прилучающихся козней лукавых врага спасения нашего огради; воздвигни твои преподобнии руце ко Господу за народ наш, да тихое и безмолвное житие поживем в веце сем до часа, в оньже имать призвати нас Владыка Господь, наш Судия нелицеприятный. Ты же, о всехвальный апостоле, не отвержи вопля нашего и стенания к тебе, но заступи нас пред Христом, твоим Учителем, да непрестанно славим Его милосердие к нам, со Отцем и Святым Духом, во веки веков. Аминь.

Молитва первоверховным апостолам Петру и Павлу
О, преславнии апостоли Петре и Павле, души за Христа предавшии и кровию вашею пажить Его удобрившии! Услышите чад ваших молитвы и воздыхания, сердцем сокрушенным ныне приносимыя. Се бо беззаконьми омрачихомся и того ради бедами, якоже тучами, обложихомся, елеа же добраго жития обнищахом зело и не возможем противитися волком хищным, иже расхищати наследие Божие дерзостно тщатся. О сильнии! Понесите немощи наша, не отлучайтеся духом от нас, да не разлучимся в конец от любве Божия, но крепким заступлением вашим нас защитите, да помилует Господь всех нас, молитв ваших ради, да истребит же рукописание безмерных грехов наших и да сподобит со всеми святыми блаженнаго Царствия и брака Агнца Своего, Емуже честь и слава, и благодарение и поклонение, во веки веков. Аминь.

Житие святого апостола Петра

Канон святому апостолу Петру

Канон на поклонение честным веригам святого апостола Петра

Акафист святым первоверховным апостолам Петру и Павлу

Икона апостола Петра находится в левой части верхнего ряда иконостаса

 

Комментирование запрещено